Закария Сисенғали
Сонау бір Алматы қаласында оқып жүрген шағымызда қолымыз қалт етсе, Абылай хан (ол кезде Коммунист, 105) даңғылындағы Жазушылар одағынан табылушы едік. Ұзақты күні талмастан «Қаламгер» кафесінде отырып, кірген-шыққан жазушылардан көз алмайтынбыз. Бір қызығы, оларды нақ бір туысымыздай шетінен жыға танитынбыз.«Әбу ақсақал келді, Әбділда ақынды қара (олар көзге сиректеу ілігетін), анау цилиндр қалпақты Асқар Сүлейменов қой, әне... әне, шашы иығына түскені Жарасқан ақын, анау бакенбард Шөмішбай», – деп бір-бірімізбен сыбырласа үн қатысып отырғанда кештің қалай болғанын білмей қалушыедік.
Күндердің күнінде Одақтың сыртқы есігінен кіріп келе жатқан, сәл еңкіштеу, бір аяғын сүйрете басатын, селдір шашты, дөңгелек көзді ақ сары адамды көргенде, бір-бірімізге бажырая қарап, аузымызға су толтырып алғандай, әлгі кісі жанымыздан өтіп кеткенше үніміз шықпастан тұрдық та қалдық.
Бұл – қазақтың қайсар жазушысы Ілияс Есенберлин еді.
Біз ол кезде Ілекеңнің «Қатерлі өткел», «Ғашықтар», әсіресе «Қаһар» деп аталатын романдарын оқып та үлгергенбіз.
Біз ол кезде Ілекеңнің «Қатерлі өткел», «Ғашықтар», әсіресе «Қаһар» деп аталатын романдарын оқып та үлгергенбіз.
Кейін Ілекеңнің сол кездегі Орталық Комитеттің саябағында жазушы Сәуірбек Бақбергеновпен әңгімелесіп отырғанын әлденеше рет көрдік.
Бертін келе жазушының «Көшпенділер», «Алтын Орда» атты тарихи шығармаларын түгесе оқып, кешегі адымыңды да, аузыңды да аштырмайтын тоталитарлық кезеңдегі қаламгердің батылдығына, ізденімпаздығына, еңбекқорлығына тәнті болдық.
Расы керек,«Мәскеу қаласына жау табаны тимеген, ұлы халықты жеңген әскер болған емес» деп, біздің санамызда сіңірдей сіресіп қалған ұғымның тас-талқанын шығарған да Ілекеңнің шығармалары еді.
Ілекең арқылы біз Жошы, Шағатай, Үгедей, Төле ұлыстарының тарихымен, Алтын Орда дәуірімен, Тоқтамыс, Ақсақ Темір, Едіге сынды ұлы тұлғалардың тағдырларымен таныстық.
Ең бастысы, ХХ ғасырдың екінші кезеңінен бастап атын ауызға алуға тиым салынған Кенесары ханның патша отаршыларына қарсы он жыл бойы жүргізген күресінің ақиқатына да Ілекең арқылы көзіміз жетіп, турасын айтқанда, өмірге қайта келгендей болып түледік.
Ең бастысы, ХХ ғасырдың екінші кезеңінен бастап атын ауызға алуға тиым салынған Кенесары ханның патша отаршыларына қарсы он жыл бойы жүргізген күресінің ақиқатына да Ілекең арқылы көзіміз жетіп, турасын айтқанда, өмірге қайта келгендей болып түледік.
Әттең дейміз-ау, Ілекең осы шығармалардың бәрін еліміз егемендігін алғаннан кейін жазғанда, қаншама құпия көмбелердің беті ашылған болар еді.
Қайсар қаламгер іштен де, сырттан да қысқаштай қысқан құрсаудың қыспағында жүріп, осыншама тарихты кейінгі ұрпаққа мұра етіп қалдырып кетті.
Жазушы шығармаларының қаншама парағы туралды, кім біледі, бізге белгілісі осыншама құнды еңбек бақталастарының кесірінен сол кездегі ең жоғары дәрежелі Лениндік сыйлыққа өтпей қалды.
Бүкіл ғұмырын елінің сан ғасырлық тұрлаулы-тұрлаусыз тағдырын көрсетуге арнаған қаламгер үшін бұдан ауыр соққы бола ма?
Тәубә, міне, Елбасымыздың ұйғарымымен үстіміздегі жылы Қазақ хандығының 550 жылдығын атап өткелі отырмыз. Биылғы жыл бүкіл елімізде көрнекті қаламгер, Мемлекеттік сыйлықтың иегері Ілияс Есенберлиннің де 100 жылдығы атап өтілуде.
Қазақ тарихы мен Есенберлин тағдыры бір-бірінен ажырамас егіз ұғым.
Кезінде ұлы жазушыны сайқал саясат, күйелеш қоғам халқынан қаншалықты алыстатқысы келгенімен, уақыт – төреші таразы басын теңестіріп, екеуін де бір арнаға түсіріп, біріктіріп, бітістіріп жіберді.
Кезінде ұлы жазушыны сайқал саясат, күйелеш қоғам халқынан қаншалықты алыстатқысы келгенімен, уақыт – төреші таразы басын теңестіріп, екеуін де бір арнаға түсіріп, біріктіріп, бітістіріп жіберді.
Ендігі жерде қазақ деген халық барда, жазушы Есенберлиннің де есімі мәңгі жасайтынына күмән жоқ.
Закария Сисенғали,
ақын-журналист.
Жаңақала ауданы, Батыс Қазақстан облысы.
//Қазақ әдебиеті.-2015.-30қаңтар
Комментариев нет:
Отправить комментарий